«…Лета 7079. Приходил к Москве Крымской царь Девлет-Кирей и мая в 24 день, на Вознесеньев день, татарове посад зажгли. И Божиим гневом, грех ради наших, Москва згорела вся: город и в городе государев двор и все дворы, и посады все, и за Москвою; и людей погорело многое множество, имже не бе числа; и всякое богатество и все добро погоре. И церкви каменые от жару росседалися, и люди в каменых церквах и в каменых погребех горели и задыхалися, едва где кто Божиим сохранением от смерти избыл. Митрополит же Кирил со освященным собором в те поры просидели в церкве Пречистые Богородице в соборной. А князь Иван Дмитреевич Белской на своем дворе в каменном погребе, задохнувся, умер. Инех же княгинь и боярынь и всяких людей хто может исчести, сколко погоре и, задохнувся, померло. И Москва-река мертвых не пронесла: нароком отставлены были спроваживати рекою на низ мертвыя; а хоронити некому; а у которых остались приятели, тех хоронили…»